তাইৰ বুকুৰ নিলাজ তিলটো

                                                                                      ~ প্ৰণৱজ্যোতি বৰা

দুপাত্তাৰ আঁৰতো লুকাব নুখোজা

তাইৰ বুকুৰ নিলাজ তিলটো,

যি মোৰ টোপনিৰ একমাত্ৰ শত্ৰু

দিয়া যাওক তাৰ বিৰুদ্ধে এখন এজাহাৰ

মোৰ টোপনি হৰাৰ প্ৰতিবাদত…

তাইৰ বুকুৰ নিলাজ তিলটো

আৰু কিমান সহিম তোৰ এই উদ্ভন্দালি ?

তাইৰ বুকুত চুমি চুমি মোৰ বুকু জ্বলাই মৰাৰ

তোৰ এই গুপুত অভিসন্ধি ?

তাইৰ বুকুৰ উমখিনি, যি মোৰ অধিকাৰ

বে-আইনীভাৱে হস্তগত কৰ তই

মোৰ দুটি ওঁঠৰ কম্পনক কৰি ভেঙুচালি

বে-আইনীভৱে চুমা দি বহি থাক গপত গংগাটোপ হৈ

তাইৰ বুকুৰ দুপাত্তাৰ আঁৰত,

হিংসা লাগে তোলৈ

তাই যে ইমান আথে-বেথে ৰাখে তোক

তাইৰ বুকুৰ মাজত…

                                               

কৃষক

তেওঁৰ সপোন নহয়

সুউচ্চ অট্টালিকা বা বিলাসী মার্চিডিজ

তেওঁৰ সপোন এহাল নিপুতল বলদ

এটি নাঙল আৰু এমুঠি সেউজীয়া।

তেৱেঁই সেইজন যাৰ দুবাহুৰ অসীম শক্তিত

অলঙ্কৃত হয় ধৰাৰ বুকু,

যাৰ পৰশত সৃষ্টি হয় সমাজ চলাৰ ইন্ধন,

যাৰ কষ্টত নির্ভৰশীল দেশৰ উন্নয়নৰ সুত্র,

আৰু তেৱেঁই সেইজন

যাৰ উপার্জন আত্মসাৎ করি

গিজ-গিজকৈ গজালি মেলে

ডকাইতী,দালালৰ অযুত বংশ..

তেওঁ নিবিচাৰে তেওঁৰ পিছে-পিছে

লানি নিচিগা জন সমুদ্র

নাইবা তেওঁক প্রয়োজন নাই

অত্যাধুনিক অস্ত্রধাৰী দেহৰক্ষী

তথাপি তেওঁ নিমজ্জিত নিস্বার্থভাবে

যোগাই যোৱাত দেশ চলাৰ ইন্ধন।



                                             ~ প্রণৱজ্যোতি বৰা